de Bartolomeo Porcheddu
Unu dìciu in s’antigòria, a propòsitu de sas curas dae sos males malos, naraiat: «Cussu chi non curat sa meighina lu curat su ferru, cussu chi non curat su ferru lu curat su fogu». Dae tempòrios, pro s’assegurare contra a chie poniat fogu, sos soberanos sardos aiant istabilidu penas sèrias. In sa “Carta de Logu”, su capìtulu XLV “Ordinamentos de fogu” narat: «Bolemus et ordinamus chi nexuna persona depiat nen potzat pònnere fogu […] non fatzat dannu a àteru».
Nointames custas leges e àteras chi nd’ant sighidu finas a sas dies nostras, in Sardigna ant brujadu buscos seculares pro bèndere sos terrinos a privados e pinetas serente su mare pro bi fraigare villàgios turìsticos; ant privatizadu fàbricas pùblicas pro brujare su traballu a sos dipendentes e ant mòrtu òmines cando lis ant fatu terrinu brujadu totu a inghìriu pro los isolare.
Cando su podere polìticu cheret bèndere carchi cosa chi est parte de totu sa comunidade, sa prima cosa chi faghet est cussa de no la fàghere prus funtzionare, a manera chi apat su cunsensu de su pòpulu cando benit brujada. Gasi est sutzessu pro sa chìmica in Sardigna, pro sas bancas sardas, pro sos istabilimentos balneares; gasi est sutzedende pro s’iscola pùblica, pro sa sanidade, pro sos trasportos e pro s’abba pùblica.
Comente amus bidu e semus bidende, custa tècnica de su fogu at dadu frutos bonos a chie at allummadu custos logos e linna brujada a sa comunidade chi los at subidos. Como, torrende a s’arrejonu nostru subra Mont’e Prama, a pustis de totu cussu chi est sutzedende, mi benit unu pensamentu: no at a èssere chi fintzas in Mont’e Prama calicunu est ponende fogu pro bèndere su logu a s’istracu baratu?
Dae cando ant leadu cussèntzia chi su giassu de Mont’e Prama est de interessu mundiale, est sutzessu de totu: brigas intre sas Universidades sardas e su Ministeru, ladros tumbarolos, bardiania chi b’est e non b’est; in prus, sas immàgines desolantes de sas ùrtimas dies cun sos iscavos allagados ant fatu su restu. Como chie cheret pònnere fogu at totu sos argumentos bonos pro cumbìnchere su pòpulu chi est bene a dare a àteros su logu ca sos sardos non bi sunt bonos a l’ammaniare.
Ma nois depimus dimustrare a custos chi cherent pònnere sas manos in su siddadu nostru chi, imbetzes, sa miniera de oro de Monte Prama nos l’amus a comporare nois. Comente? In antis de totu faghende bàlere s’artìculu 3 de s’Istatutu, in ue sa Regione at potestade legislativa in matèria de museos de entes locales. Pro tantu tocat de fàghere luego unu museu de “Mont’e Prama” pro nde lu bogare dae sas cumpetèntzias de su Ministeru istatale. A pustis, tènnere abertos sos iscavos a su pùblicu a manera chi totu potzant bìdere sos traballos in andera.
Paghende unu billete de 5 euro de intrada podimus finantziare s’iscavu pro semper e mantènnere su giassu in manos nostras. Dae s’antigòria sos sardos aiant imparadu chi pro arressare su fogu non bi cheriat nen sa meighina nen su ferru, ma su fogu matessi. Fogu contra fogu. Su terrinu brujadu de Mont’e Prama nos lu podimus comporare nois sardos cundunu billete de 5 euro.
Bartolomeu, m’agattas d’accordiu con tui candu naras ca nosus sardus doppeus valorizzare s’antichidade e sa testimonianza storica de sa nostra terra millenaria. Valorizzare pero’ no boli nare incassare 5 euro de billettu. Du scisi chi “Gli Uffizzi” de Firenze scetti cun su dinai de is billettus non paganta is ispesas de gestioni. Ma e’ tottu sa cittadi de Firenze e s’ interu territoriu de Toscana chi esti valorizzau po sa fama chi custas bellezzas artisticas tenint in tottu su mundu. Albergus prenus tottus is dies de s’annu, binus cumenti chianti e vinsanto e specialidades cumenti panforte e cantuccini in bella mostra in tottus is mellus logus de is cincus cuntinentes: e’ custa sa vera ricchesa chi nosatros deppeus essi bonus a circari. No unu o dus ( sa die ‘ festa) postus de billettaiu a Monti Prama. Forza paris. Antonio
Saludi Antonio, seu de acòrdiu cun tegus chi nde balàngiat totu su territòriu, ma si b’at una gestione bona si podent finantziare fintzas sos iscavos. Su Sagrada Famìlia, sa crèsia noa de Barcelona, l’ant fraigada sceti cun si dinari de sos bisitadores. Ateretantu podimus fàghere nois cun Monte Prama. Su billete de 5 euro l’ant a pagare totu sos amantiosos de archeologia de su mundu. Bèrtulu